چنڊ، محمد عمر

چنڊ، محمد عمر: لسانيات جي ماهر ۽ استاد محمد عمر ولد حاجـي محـمـد خـان چـنڊ، 12 سيپٽمبـر 1944ع تي ڳـوٺ نئـون آباد، تعلقي ڄام نواز علي خان، ضلعي سانگهڙ ۾ جنم ورتو. ابتدائي تعليم ڪنڊياريءَ مان ورتائين. 1961ع ۾ مئٽرڪ هاءِ اسڪول ٽنڊي محمد خان مان ڪيائين. 1966ع ۾ انٽر سروري اسلاميه ڪاليج مان پهرين پوزيشن سان پاس ڪيائين. 1970ع ۾ ايم. اي (انگريزي ادب) ڍاڪا يونيورسٽيءَ مان ڪيائين. محمد عمر چنڊ تعليم مڪمل ڪرڻ کان پوءِ تعليم کاتي ۾ استاد مقرر ٿيو. 1971ع ۾ سروري اسلاميه ڪاليج هالا ۾ انگريزيءَ جو ليڪچرار ٿيو ۽ 1972ع ۾ سنڌ يونيورسٽيءَ جي انسٽيٽيوٽ آف ايجوڪيشن ۾ ليڪچرار مقرر ٿيو. 1974ع ۾ اسڪالرشپ تي يونيورسٽي آف ايلنواڊ، آمريڪا ۾ پڙهڻ ويو، جتي لسانيات تي اهم مضمون پڙهيائين. جنهن بعد اتي ڪجهه عرصو پڙهائيندو به رهيو. محمد عمر چنڊ ايران جي رايل ايئر فورس ۾ 1975ع کان 1979ع تائين پڙهايو. ان کان سواءِ عراق جي ممل يونيورسٽيءَ ۾ 1980ع تائين پڙهايائين. ان بعد هن ٽنڊي ڄام زرعي يونيورسٽيءَ ۾ 1982ع تائين هڪ استاد جي حيثيت ۾ پڙهايو ۽ برونائي دارالاسلام ۾ 1985ع کان 1989ع تائين پروفيسر جي حيثيت ۾ تعليمي خدمتون سرانجام ڏنائين.
محمد عمر چنڊ هڪ عالم شخص آهي. هن جا هيٺيان ڪتاب مڃتا ماڻي چڪا آهن: (1) سنڌي ٻوليءَ جون آراڌايون (ٻه ڇاپا)، (2) Using Question- Answer Techniques (1985)، (3) حر تحريڪ (انگريز سامراج خلا حرن جي سئو سالا جنگ: 2002ع)، (4) World of Work, Iredicatment of a Scholar (هن ڪتاب ۾ ڊاڪٽر بلوچ جا ۽ ڊاڪٽر بلوچ ڏانهن 1946ع کان 2006ع تائين لکيل انگريزي خط جمع ڪيل آهن، جيڪو 2007ع ۾ انسٽيٽيوٽ آف سنڌالاجيءَ ڇپايو آهي.)

داخلا ۾ استعمال ٿيل تاريخون

1944.09.12  عيسوي

لسانيات جي ماهر ۽ استاد محمد عمر ولد حاجـي محـمـد خـان چـنڊ، 12 سيپٽمبـر 1944ع تي ڳـوٺ نئـون آباد، تعلقي ڄام نواز علي خان، ضلعي سانگهڙ ۾ جنم ورتو.

شخصيتون - ڀاڱي جون ٻِيون داخلائون